ಫೈನಾನ್ಸ್ ಕಂಪನಿ ಆಕೌಂಟ್‌ಗೆ ಸೈಬರ್ ಚೋರರು ಕನ್ನ ಹಾಕಿರುವ ಘಟನೆ ನಡೆದಿದೆ. ಕೇವಲ ಮೂರು ಗಂಟೆ ಅವಧಿಯಲ್ಲಿ 49 ಕೋಟಿ ರೂಪಾಯಿ ಹಣವನ್ನು ಗುಳುಂ ಸ್ವಾಹಃ ಮಾಡಿದ್ದಾರೆ. ಪ್ರತಿಷ್ಠಿತ ಫೈನಾನ್ಸ್ ಕಂಪನಿಯೊಂದು ವ್ಯಾಪಾರ ವ್ಯವಹಾರ ಮಾಡುವ ಜನರಿಗೆ ಲೋನ್ ಕೊಟ್ಟು ವ್ಯವಹಾರ ಮಾಡ್ತಿದ್ರು. ಅದ್ರೆ ಇಂತಹ ಫೈನಾನ್ಸ್ ಕಂಪನಿ ಮೇಲೆ ಸೈಬರ್ ಚೋರರ ಕಣ್ಣು ಬಿದ್ದಿತ್ತು. ಆ ಬಳಿಕ ಆಕೌಂಟ್ ಹ್ಯಾಕ್ ಮಾಡಿ ಕೋಟಿ ಕೋಟಿ ಹಣವನ್ನ ಲಪಟಾಯಿಸಿದ್ದಾರೆ. ವಿಸ್ಡಮ್ ಫೈನಾನ್ಸ್ ಆಕೌಂಟ್ ಮೇಲೆ ಕಣ್ಣಿಟ್ಟಿದ್ದ ಸೈಬರ್ ಖದೀಮರು, ಬ್ಯಾಂಕ್ ಖಾತೆ ಹ್ಯಾಕ್ ಮಾಡಿ ಬರೋಬ್ಬರಿ 49 ಕೋಟಿ ರುಪಾಯಿ ಹಣವನ್ನ ಕೊಳ್ಳೆ ಹೊಡೆದು ಸುಮಾರು 653 ನಕಲಿ ಖಾತೆಗಳಿಗೆ ವರ್ಗಾವಣೆ ಮಾಡಿದ್ದಾರೆ.
ಸೈಬರ್ ವಂಚಕರು ವಿದೇಶದಲ್ಲಿ ಕುಳಿತು VPN ನೆಟ್ ವರ್ಕ್ ಬಳಸಿ ಹ್ಯಾಕ್ ಮಾಡಿದ್ದಾರೆ ಅನ್ನೋದು ಗೊತ್ತಾಗಿದೆ. ಆಗಸ್ಟ್ 7 ರಂದು ಫೈನಾನ್ಸ್ ಕಂಪನಿಯ ಎರಡು ಖಾತೆಗಳನ್ನ ಹ್ಯಾಕ್ ಮಾಡಿದ್ದು, ಆಗಸ್ಟ್ 9 ರಂದು ಫೈನಾನ್ಸ್ ಕಂಪನಿ ಮ್ಯಾನೇಜರ್ ಪ್ರಕಾಶ್ ಪೊಲೀಸರಿಗೆ ದೂರು ನೀಡಿದ್ದಾರೆ. ಆ ಬಗ್ಗೆ ತನಿಖೆ ಕೈಗೊಂಡ ಸಿಸಿಬಿ ಸೈಬರ್ ಕ್ರೈಮ್ ಪೊಲೀಸರು, ರಾಜ್ಯ ಹಾಗೂ ಹೈದರಾಬಾದ್‌ನಲ್ಲಿ ಹುಡುಕಾಟ ನಡೆಸಿ ಬೆಳಗಾವಿ ಮೂಲದ ಇಸ್ಮಾಯಿಲ್ ಅತ್ತರ್ ಹಾಗೂ ಮಹಾರಾಷ್ಟ್ರದ ಸಂಜಯ್ ಪಾಟೀಲ್ ಎಂಬುವರನ್ನ ಬಂಧಿಸಲಾಗಿದೆ. ಆರೋಪಿ ಇಸ್ಮಾಯಿಲ್ ಸರ್ವರ್ ಮಾಹಿತಿಯನ್ನ ದುಬೈನಲ್ಲಿದ್ದ ಭಾರತದ ಮೂಲದ ವ್ಯಕ್ತಿಗೆ ನೀಡಿದ್ದನು. ಆತ ಹಾಂಕಾಂಗ್‌ನಲ್ಲಿದ್ದ ಚೀನಾ ಮೂಲದ ಹ್ಯಾಕರ್‌ಗಳಿಗೆ ಸರ್ವರ್ ಮಾಹಿತಿ ರವಾನಿಸಿದ್ದಾನೆ ಅನ್ನೋ ಮಾಹಿತಿ ಇದೆ. ಅಲ್ಲಿದ್ದ ಫೈನಾನ್ಸ್ ಕಂಪನಿ ಖಾತೆಗಳನ್ನ ಹ್ಯಾಕ್ ಮಾಡಿದ್ದರು ಅನ್ನೋದು ಗೊತ್ತಾಗಿದೆ.
ಫೈನಾನ್ಸ್ ಕಂಪನಿ ಬ್ಯಾಂಕ್ ಖಾತೆ ಹ್ಯಾಕ್ ಮಾಡಿದ ಸೈಬರ್ ಚೋರರು 653 ನಕಲಿ ಖಾತೆಗಳಿಗೆ ಹಣ ವರ್ಗಾವಣೆ ಮಾಡಿದ್ದಾರೆ. ಅದರಲ್ಲಿ ಕೆಲವು ಸಾರ್ವಜನಿಕರ ಖಾತೆಗಳಿದ್ದು, ಅವರಿಗೆ ಕಮಿಷನ್ ಕೊಟ್ಟು ಹಣ ಡ್ರಾ ಮಾಡಿಸ್ತಿದ್ರಂತೆ. ಹೀಗೆ ಮಹಾರಾಷ್ಟ್ರ ಮೂಲದ ಸಂಜಯ್ ಪಾಟೀಲ್ ಖಾತೆಗೂ ಹಣ ಬಂದಿತ್ತು ಎನ್ನಲಾಗಿದೆ. ಬೆಳಗಾವಿ ಮೂಲದ ಆರೋಪಿ ಇಸ್ಮಾಯಿಲ್ ಅತ್ತರ್ ಮೂಲಕ 5 ವಿಪಿಎನ್ ಬಾಡಿಗೆಗೆ ಖರೀದಿ ಮಾಡಿದ್ದು, ಆ ಮೂಲಕ ಈ ಹ್ಯಾಕ್ ನಡೆದಿರೋದು ಗೊತ್ತಾಗಿದೆ. ನಂತರ ಹಣವನ್ನ ಹವಾಲ ಮತ್ತು ಕ್ರಿಪ್ಟೊ ಕರೆನ್ಸಿ ಮೂಲಕ ವಿದೇಶಕ್ಕೆ ರವಾನೆ ಮಾಡ್ತಿದ್ದರು ಅಂತಾ ಸಿಸಿಬಿ ಪೊಲೀಸರ ತನಿಖೆಯಿಂದ ಬೆಳಕಿಗೆ ಬಂದಿದೆ. 49 ಕೋಟಿ ದೋಖಾ ಮಾಡಿದ ಆರೋಪದ ಮೇಲೆ ಇಬ್ಬರು ಆರೋಪಿಗಳನ್ನ ಬಂಧಿಸಿದ ಸಿಸಿಬಿ ಸೈಬರ್ ಕ್ರೈಮ್ ಪೊಲೀಸರು, ಲ್ಯಾಪ್ ಟಾಪ್ ಜಪ್ತಿ ಮಾಡಿದ್ದಾರೆ. ಜೊತೆಗೆ ವಿದೇಶದಲ್ಲಿ ಕುಳಿತು ಆಟ ಆಡಿರುವ ಐವರು ಖದೀಮರ ಬಂಧನಕ್ಕೂ ಜಾಲ ಬೀಸಿದ್ದಾರೆ.
